PASQUALI IVIU di SAN DAMIANU hà creatu in u 1986 a prima scola di cantu pulifonicu tradiziunale in Fulelli. S'amparava u cantu in paghjella, paghjelle, terzetti, madricali, curentine, messe. Iviu chjamò sta scola MADRICALE, fubbenu più di sessanta zitelli à imparà à cantà. Più tardi escia u gruppu iniziatu in sta scola, logicamente si chjamò MADRICALE. A rialità fù chì i zitelloni di sta squadra eranu assai agalabati, tutti di Castagniccia. Parlendu u corsu anu fattu in furia di fà sente e so voce putente, linde è chjare in a Corsica sana è dinù in cuntinente à u Paese Bascu è in Sardegna. L'amore di u cantu in paghjella ma sopr'à tuttu a fratellanza è a spartera anu fattu di Madricale un gruppu unicu cù una sincerità culturale è, da un puntu di vista tradiziunale, chjaru, dirittu è disinteressatu. Anu arrigistratu un primu dischettu in u 1992, sperianza scarsa per zitelli da 8 à 15 anni, ind'è International Studio.
Un secondu dischettu hè esciutu in u 1995, arregistratu in chjesa di SAN DAMIANU. Iviu ùn s'hè micca piantatu di prumove a so passione di a paghjella, hà furmatu torna zitelli è più chè zitelli in TAVAGNA, in CASINCA, in OREZZA, bella intesa chì u puntu centrale si trova in l'ALZI di SAN DAMIANU. Sì parechji, oghje, cantanu messe, sanu dinù versu quale girassi. In u 2003 incù i so figlioli è i so cugini, Iviu hà arregistratu in famiglia un dischettu di canti in paghjella di San Damianu. Hè sempre statu messu in ballu u fattu sputicu è culturale di u cantu in paghjella, u solu interessu era morale, tradiziunale è storicu. Senza mai fà nisun prufittu incù u solu penseru di pudè trasmette un sapè anticu è di mantene una manera unica di cantà, Iviu ùn s'hè mai staccatu da a strada diritta ch'ellu s'era tracciatu per a difesa di a so cultura musicale. Senz'aiuti nè entrendu inde u sistema di speculazione culturale, a riesciuta di Madricale hà pruvatu ch'ella ci era una dumanda è un bisognu di sviluppà stu generu di sperianze. Malgradu tutte e farzite ch'ellu si pò sente oghje nantu a paghjella è nantu a messa.
Dédé Olivi, Iviu Pasquali è Tumasgiu Cipriani