Figliulinu di Ghjuvan'Camellu, chì e canzone è l'arie d'organettu anu animatu parechje serate, Iviu Pasquali hà mantenutu una tradizione cù un'origine bella luntana. Paisanu di San Damianu, in sta valle d'Orezza induve certi lottanu sempre pè fà rinvivisce u rughjone, hà publicatu « Paghjelle è puesie di Castagniccia ».

Ricirchendu sempre e tracce è e vistighje di u nostru passatu, passiunatu pè a nostra storia è e nostre radiche, prova dinù à dà fiatu à a creazione... Bella sicura i testimoni di quelli chì a l'anu pruvata prima à ‘mpruvisà è à scrive in Corsu, l'amicu Pasquali ùn li mette micca da cantu ; à u cuntrariu, sò a so nutritura, a surgente di e soie l'ispirazioni. Ch'ellu ùn si parli chè di Carlu Piroddi d'Alisgiani, di Ghjuvan'Camellu Pasquali, babbone di l'autore, o puru di Ghjuvanni di Fiuminale.
Stefanu PASTINELLI

Un libru esciutu à l'edizioni Cismonte è Pumonte