Dapoi sempre, u paese di San Damianu hà cantatu a paghjella. Certi paisani anu addunitu e so voci in u dischettu « Canti in paghjella di San Damianu ». Sò arie tradiziunali chì l’anziani anu lasciatu. Attavulinatu in a pezzuccia induve u caccaru sunava l’urganettu, Iviu Pasquali scrivacciuleghja qualchì pensamentu in corsu, parolle chì diventeranu dopu un cantu in paghjella, tradizione pulifonica di Castagniccia. Dice : « Facciu cum’è e persone anziane, scrivu canti truvendu l’estru in a vita d’ogni ghjornu nant’à arie d’eri. ». L’impegnu d’Iviu Pasquali hè assai ligatu à a so andatura persunale. Zitellu di San Damianu, di Zuani, di a citadella è di u quartieru San Ghjiseppu di Bastia, avia avutu bisognu di vultà in paese, dopu à una quindecina d’anni di luntananza per via di u travagliu. Militendu à prò di u rinnovu ecunomicu di a Castagniccia, hà scuntratu à Petru Maria Vitani, direttore di a sucietà di sfruttamentu di l’acque d’Orezza, paisanu è merre di Tarranu, è tramindui anu u listessu parè in quant’à u sviluppu rurale. Difensore di l’anima rurale, Iviu Pasquali si ramenta chì quand’ella zitellu, ùn cantava a paghjella ma hà campatu in un universu di parolle è di soni.
Ghjuvan Camellu Pasquali, u caccaru d'Iviu Pasquali
ritrattu pigliatu in l'annate 30
Stava à sente l’anziani, in particulare i so caccari, di e famiglie Pasquali di San Damianu è Giuganti di Zuani, chì interpretavanu st’arie rispechjendu u campà d’ogni ghjornu, a manera di pensà è di risente e cose. Cantavanu cum’elli campavanu. A cultura ùn era una rivindicazione ma una manera d’esse. Dopu, Iviu hà amparatu à cantà cù amichi è cù u so caccaru, Ghjuvan’Camellu, pastore è lavuradore, chì vucighjava è sunava l’urganettu davant’à u fucone durante una bella stonda. Vulendu trasmette anch’ellu, Iviu Pasquali hà creatu in Fulelli, in u 1986, a prima scola di cantu pulifonicu di Corsica chjamata Madricale. Più di sessanta zitelli anu frequentatu sta scola è u gruppu, chjamatu dinù Madrigale, autore di parechji cuncerti è di dui dischi, andava in i paesi. Cusì, in tuttu, hà amparatu à più di centu persone, giovane è maiò, l’arte di a paghjella. In « canti in paghjella di San Damianu », Iviu Pasquali è i dui figlioli Damianu è Ghjuvan’Camellu, Cristofanu Sicurani è Federicu Boujon cantanu arie sacre o prufane. Ci sò dinù durante l’uffizi religiosi è cù altri canterini. Anu un spiritu di cumunione è una vuluntà di restituì l’anima è u core di un modu d’interpretazione pulifonica specificu à San Damianu ch’è no ritruvemu in stu dischettu, presentatu durante a « Merendella in Castagniccia » in Pedicroce. Un’opera di un gruppu d’amichi chì hà sceltu « di campà a cultura, di falla campà è di servela. » Cristofanu Sicurani, 30 anni, è Federicu Boujon, 31 annu, sò anziani elevi d’Iviu Pasquali. U primu cantava a messa à parte da 13 anni è avia pruvatu à cuntinuà cusì in i gruppi I Surghjenti è Corsica. Travagliadore à tempu parziale in u spettaculu durante trè anni, st’anzianu discepulu di Madricale hà datu cù ste furmazioni parechji cuncerti è era una voce corsa di u spettaculu di Ghjilormu Savary, « Dommage qu’elle soit une putain ». Cristofanu colla sempre nant’à a scena pè accumpagnà à Antone Ciosi è Ericcu Mattei, è « pè porghje a so petra à l’edifiziu di u mantenimentu di e tradizioni chì si perdenu ».
Ghjuvan Camellu Pasquali, Ghjuvan Dumenicu Basteri, Iviu Pasquali,
Francescu Pasquali è Damianu Pasquali.
In quant’à u percorsu di Federicu Boujon, 31 annu, hè cum’è quellu d’Iviu Pasquali, dunque una vultata à l’urigini. « Dopu à a morte di Natale, u caccaru, m’ero alluntanatu di San Damianu. Sette anni fà, aghju vulsutu ritruvà e mo radiche. Aghju travagliatu a terra è scuntratu à Iviu, un cuginucciu, chì m’hà prupostu di raghjunghje u gruppu Madricale. Aghju travagliatu a mo voce cù i membri di u gruppu è in paese eppo cù Alanu Nicoli di a cunfraterna San Ghjiseppu di Bastia. Sta sperienza m’hà permessu di ritruvà u chjassu di a lingua è a cultura corsa. U dischettu « Canti in paghjella da San Damianu » hè cumpostu di 17 arie sacre è prufane di u ripertoriu tradiziunale di e paghjelle di San Damianu. I testi sò di Ghjuvan’Camellu Pasquali è di u puetu di Castagniccia Ghjuvan di Fiuminale, d’altri sò cumpusizioni persunali d’Iviu Pasquali. L’opera si compie nant’à un arrigistramentu di Ghjuvan’Camellu Pasquali, tempi fà. Secondu Iviu Pasquali : « Ghjè un ochjata à l’anziani chì m’anu trasmessu una fiaccula ch’o trasmettu anch’eo. » L’opera hè stata arrigistrata « durante dui dopu meziorni, un fattu mai accadutu nanzu », à u studio l’Angelina di Ghjuvan’Bernardu Rongiconi in Valle di Rustinu. L’addunita d’energie diverse hè stata primurosa pè rializà stu prugettu musicale. Pè Federicu Boujon, « a cultura ùn hè micca solu u fattu di l’artisti. Quelli chì anu participatu à a rializazione di stu dischettu sò, à modu soiu, attori culturali. »