Pulifunie, Polyphonies
Una voce in parechje

Pulifunie d'Iviu Pasquali esce torna cù elementi in più. U titulu hè un plurale. Indetta una varietà in un'unità. Riesce cù parechje voci à fanne una hè un acme culturale, un Monte Cintu di a cultura di un populu. Isula muntagna induve s'alza un cantu cimaghju.

Hè vera chì l'opera di una voce in parechji hè, di sicuru, un fenomenu cunnisciutu in diverse parti di u mondu. I Pigmei cantanu e pulifunie più cumplesse è magnifiche.

Ma ci tocca à dì chì ste pulifunie ùn sò manc'appena u privilegiu d'una tresca di specialisti ; bensì ste pulifunie sò l'appannaghju di u populu. Stu populu disprezzatu da a sgiurizia.

Stu bassu populu, stu populu minutu, chì ùn campa micca in i palazzi di i guvernadori. Stu populu mandatu à fassi macellà a pelle in e guerre. Stu populu chì, puru straziendu ogni ghjornu da stantassi u pane, hà sapiutu tene fin'ad oghje in mente, in core è in bocca, sta voce chì face ribumbà a volta di e chjese è quella di u celu.

Pulifunie d'Iviu Pasquali hè una grazia di a tradizione d'oghje da dumane. 

Rinatu COTI

 

Un libru esciutu à l'edizioni Matina Latina.